Nakasulod ang Ivory Coast sa knockout stage sang FIFA World Cup sa labing-una nga tion!
Naka-brace ukon duha ka goals sang former Arsenal forward nga si Nicolas Pepe sa ika-7 kag ika-64 nga minuto nga amo ang dalayon nga naglutos sa Curacao, 2-0, sa group match nga nagtakop 6:00 subong nga aga Philippine time.
Antes sini, lunsay wala nakalampuwas ang Ivory Coast sa group phase sa ila nauna nga tatlo ka beses nga pagtapak sa nagligad nga mga edisyon sang World Cup.
Nagtapos ini nga pungsod nga may sais puntos — una man nga tion nga nakadaog sila sang duha ka group matches sa sini nga tournament.
ECUADOR VS GERMANY
Sa pihak nga hampang, naka-abante man ang Ecuador sa knockout stage matapos ang upset batok sa four-time World Cup champion nga Germany, 2-1.
Nagtakop ang hampang sa Group E 6:00 subong nga aga Philippine time.
Una nga naka-score sa Europeans si Leroy Sane sa ikaduha nga minuto apang naka-goal man para sa Ecuador sa 9th minute si Nilson Angulo.
Sa ika-77 nga minuto, sigurado na ang kadalag-an sang Ecuador paagi sa goal ni Gonzalo Plata.
Antes ini nga hampang, una naman naka-abante ang Germany sa knockout rounds bangud sa ila kadalag-an sa una nga duha ka games.
Nagapangatlo ang Ecuador sa Group E apang guaranteed nga makaabante sa Round of 32. May kuatro puntos sila sa group phase kag isa sa eight best third-placed teams.
