Naglapaw na sa 2,300 ka tawo ang nagkalamatay bangud sa linog nga nagtay-og sa south-eastern Turkey malapit sa border sang pungsod sa Syria.
Suno sa disaster agency sang Turkey, masobra 1,500 ang death toll sa lugar nga sakop pa sang pungsod, samtang ginabanta nga 810 naman ang patay sa Syria.
Ginakahangaw-an nga magsaka pa ang numero bangud sa subong, nabudlayan ang rescuers sa pag-responde sa iban pa nga mga biktima bangud sa malain nga winter weather.
Sa rekord sang United States Geological Survey, ginpahayag nga 7.8 magnitude ang nagtay-og (04:17 local time) malapit sa syudad sang Gaziantep. Suno sa survivors, duha ka minutos ang ginlawig sang pagtay-og.
12 ka oras ang nagligad, natabo ang 7.5 magnitude nga linog kun sa diin ang epicentre amo naman ang Elbistan district sang Kahramanmaras province. Suno sa Disaster and Emergency Management Authority, indi ini “aftershock” kundi “independent” ukon separado sa una natabo nga pagtay-og.
Ginpahayag naman ni President Recep Tayyip Erdogan nga ini ang pinakamalala nga linog nga natabo sa Turkey halin sang 1939. Sang amo nga tuig may linog man nga nagpatay sa halos 33,000 ka mga tawo. Sang 1999, may makamamatay man nga linog sa northwest sang Turkey kun sa diin 17,000 ang death toll.
Nahamtang ini nga pungsod sa ginakabig isa sa most active earthquake zones sa kalibutan.
Nagapanawagan na subong ang Turkey kag Syria sang bulig halin sa iban nga mga pungsod. Bisan ang magkaaway nga Russia kag Estados Unidos sang Amerika ang lunsay na nga nagkomiter sang bulig para sa mga apektado sa amo nga kalamidad. ##
