Ginkwestyon ni Vice President Sara Duterte ang sinseridad sang administrasyon ni President Ferdinand Marcos, Jr. sa pag-imbestigar sa mga iregularidad sa flood control projects.
Partikular nga gintumod sang bise-presidente kun ngaa wala gihapon nasilutan sanday former House Speaker Martin Romualdez kag former House Committee on Appropriations chairman kag Ako Bicol party-list Rep. Zaldy Co.
Nag-resign si Romualdez bilang lider sang Kamara sang Myerkules, Septyembre 17, samtang si Co naman ang gin-report nga yara sa Estados Unidos sang Amerika para sa medical treatment.
Pahayag pa sang bise, ang pag-ilis sang liderato sa Kamara ang kabahin lamang sang “preparasyon” para sa 2028 presidential elections.
“Isa sa mga examples na masabi ko sa inyo na wala talaga silang sinseridad sa imbestigasyon sa flood control kasi tinuro na, pinangalanan na, hindi lang ako ang nagsabi, Zaldy Co at Martin Romualdez. Si Zaldy Co, hinayaan nilang umalis ng bansa. Si Martin Romualdez, hinayaan nilang mag-resign. Nag-resign naman na, so tapos na ang usapan,” suno kay Sara.
Ginsal-ot sini nga involved ang opisina ni Marcos sa “kidnapping” kay former President Rodrigo Duterte kag pagdala sa iya sa The Hague, apang suno sa iya, sang si Co na ang yara sa Amerika, wala man ini gin-“kidnap” sang administrasyon kag ginbalik sa Pilipinas.
Ginapamangkot man ni Sara kun ngaa indi mahimo sang administrasyon nga ma-preso si Romualdez sa detention unit sang Kamara.
“Ang Office of the President, involved sila sa kidnapping ni dating Pangulong Rodrigo Duterte. Bakit ngayon, nawala si Zaldy Co at maalis si Martin Romualdez, hindi man lang nila magawa na kidnapin si Zaldy Co doon sa Amerika at ibalik dito sa atin sa Pilipinas? At hindi man lang nila magawa na ikulong si Martin Romualdez diyan sa detention unit ng House of Representatives?”
Nahibaluan nga ang mag-asawa nga Curlee kag Sarah Discaya ang naka-mensyonar sang pangalan nanday Romualdez kag Co kadungan sang hearing sang Senado sa flood control projects. Pareho na ini nga gin-deny sang duha ka nasambit nga mga mamalidha.
