ILOILO CITY – Gin-assign sa Regional Personnel and Holding Unit (RPHAU) sang Police Regional Office VI ang duha ka pulis sa Western Visayas nga nagpositibo sa test sa paggamit sang iligal nga droga.
Antes ang drug test, assigned ang duha ka pulis sa mga municipal police stations sa Candoni kag Cauayan sa Negros Occidental.
Sila ang ginpaidalom sa illegal drug use test sang separado nga petsa (Disyembre 5, 2020 kag Enero 19, 2021) kag lunsay napamatud-an nga nagagamit sang shabu.
Wala naghatag sang pangalan ang PRO VI kun sanday sin-o ini nga mga pulis apang una na ginkumpirma ni PRO VI Director Police Brigadier General Rolando Miranda nga may rangko nga Police Corporal kag Police Master Sergeant ang duha ka police personnel.
Sa interview sang Bombo Radyo kay Police Lt. Col. Joem Malong, spokesperson sang PRO VI, iya ginpahayag nga nakit-an nga nagareport sa RPHAU ang isa ka pulis bangud handa siya nga magpaidalom sa drug re-test kag magpaidalom sa imbestigasyon.
May nabaton naman nga report si Malong nga wala na nagpakita sa iya trabaho ang isa ka pulis.
Posible masipa halin sa ila serbisyo ang duha ka pulis kun mapamatud-an sa imbestigasyon nga nagagamit matuod sila sang iligal nga droga.
Sa subong, 6,884 na ka mga pulis ang napaidalom sa drug test sa Rehiyon VI; kag 6,871 ang natalana pa lang nga i-subject sa test.
Ang drug test ang gina-administer sang Regional Crime Laboratory Office kag gina-surpervise sang Regional Investigation and Detective Management Division.
Mayor nga katuyuan sini amo nga mapat-od nga wala sang PNP Personnel nga involved sa anuman nga aktibidad sa iligal nga droga — user man, pusher, ukon drug protector.
