Nag-agum sang pilas ang isa sa mga subject sa drug buy-bust operation nga ginpatigayon sang Iloilo City Drug Enforcement Unit (CDEU) sa Barangay Balabago, Jaro, Iloilo City matapos nga ginapahayag nga nagpalagyo.
Ang mga subject amo sanday John Winston Porras, 30-anyos residente sang nasambit nga lugar; Jesus Angelo Martinez, 34-anyos, kag Berna Villarosa, 25-anyos residente sang Bolilao, Mandurriao, Iloilo City.
Ginakabig man ang tatlo nga HVI ukon High Value Individual.
Sa interview sang Bombo Radyo kay Police Colonel Kim Legada, Director sang Iloilo City Police Office, iya ginpahayag nga ang buy-bust operation ang nagresulta sa pagbaylohanay sang lupok sa tunga sang subject kag sa mga kapulisan.
Suno kay Legada, posible nga ginkonsiderar sang subject nga si Porras nga magpalagyo-padulong sa hospital bangud sa pilas sa kamot nga naangkon sini.
Ginbuyagyag man sang director nga na-delay ang inventory sang operasyon bangud sa may ginpanghaboy nga iligal nga druga ang subject lakip na ang armas nga gingamit ni Porras sa pagpaniro.
Wasak naman ang windshield sang salakyan sang main subject matapos ang nagluntad nga pagbalohanay sang lupok.
Nahibaluan nga nagpalagyo ang mga subject matapos nagdeklarar ang police poseur buyer nga isa siya ka pulis kag nagapatuman sang buy-bust operation.
Padayon naman nga ginatipon sang otoridad ang mga dugang nga na-recover halin sa mga subject agud matumod ang balor sang iligal nga droga.
Nagapati ang tiya sang isa sa mga subject sa drug buy-bust operation nga ginpatigayon sang Iloilo City Drug Enforcement Unit (CDEU) nga planted ang operasyon.
Sa interview sang Bombo Radyo kay Alyas Tata, tiya ni John Winston Porras, iya ginpahayag nga ginbanggan sang kapulisan ang iya hinablos sa isa ka stoplight rason nga nagpalagyo ini padulong sa hospital.
Suno kay Tata, tuyo nga patyon sang pulis ang iya hinablos rason nga madasig man ini nga nagpalagyo.
Nagapatu man ang natungdan nga ang mga na-recover nga iligal nga druga halin sa iya hinablos ang isa lamang ka lain nga bersyon sang kapulisan.
Gin-athag man sini nga isa lamang ang iya hinablos nga nagpadulong sa hospital matapos nagpalagyo kag indi sini kilala ang mga kaupdanan sini.
