Nagdangat sa 10 ka tawo ang napatay sang nagtibusok ang isa ka eroplano sa tunga sang dalan sa central Selangor sa Malaysia.
Lakip sa mga napatay amo ang walo ka mga tawo nga sakay sa eroplano kag ang driver sang kotse kag driver sang motorsiklo nga yara sa dalan sang natabo ang plane crash.
Una na nga ginpahayag sang civil aviation authority sang pungsod nga anum ka mga pasahero kag duha ka flight crew ang yara sa eroplano sang naghalin ini sa Langkawi padulong sa Selangor nga nahamtang sa nakatundan sang kapital sang pungsod nga Kuala Lumpur.
Suno naman sa impormasyon halin sa Selangor police chief, nadulaan sang contact ang aircraft sa air traffic control tower. Wala sang emergency call suno sa natungdan kag nahatagan sang clearance ang eroplano nga maghugpa.
Ginapangita pa ang black box sang eroplano nga nagaunod sang flight data.
Padayon man ang imbestigasyon suno sa transport minister kag gina-kilala pa sang forensic officials ang mga biktima. #
