Masobra sa 100 ka tawo ang napatay kag masobra 700 ang pilason matapos nga gin-alegar nagpinalupok ang pwersa-militar sang Israel sa mga tawo sa Gaza nga nagpunsok agud kuntani nga makapangayo sang ayuda.
Suno sa health ministry sa Palestine, nagsaka na sa 112 ang numero sang patay (as of presst time) kag 750 naman ang nasamaran kag subong padayon pa nga ginabulong sa Al-Shifa Hospital nga haluson man makagana bangud sa epekto sang gyera.
Sandig sa mga nakasaksi kag mga medics sa Al-Nabulsi sa south sang Gaza City, natabo ang ginapahayag nga “massacre” bangud sa Israeli Defense Forces, apang sabat naman sang militar, natabo ang casualties bangud sang bayolente nga pagtipon sang mga residente sa palibot sang mga truck nga nagaunod sang ayuda. Ini ang rason suno sa militar nga nagsampawanay ang mga ini kag nasamaran.
Makaligad sini, may opisyal ang Israeli Defense Forces nga nag-ako nga napalupok sila bilang warning kag sang ulihi napilitan na nga magtiro bangud sang mga nagdalalagan padulong sa mga truck kag sa tangke sang militar nga nagaupod man sa convoy. Suno sa opisyal, ang gintiro lamang amo ang mga ginlantaw nga delikado.
Ginsiling naman sang spokesman sang opisina ni Israeli Prime Minister Benjamin Netanyahu nga kadam-an sa mga napatay ang naipit sa mga truck.
Gina-review pa subong kun ano gid ang natabo apang para kay United States President Joe Biden, sigurado nga ini nga hitabo ang magapa-kumplikado pa sang negosasyon sa paghilway sang mga bihag.
Ginahaboy na subong ang Israel sang wala-tuo nga pagpakamalaot halin sa Palestinian leaders kag iban pa nga mga pungsod bangud sa amo nga “massacre.”
Kumpirmado man nga magapatigayon sang meeting ang top body sang United Nations — sandig sa request sang Algeria — agud maistoryahan ang amo nga hitabo.#
