ILOILO – Ginkilala sang Iloilo Provincial Government ang pagpanikasog sang Emergency Responders of Iloilo ukon e-ROI sa pagbulig sa mga nagakinahanglan sang first aid kag iban pa sa selebrasyon sang Dinagyang Festival 2020.
Ini ang rason kun ngaa nakabaton sang labing una nga Scout Roy Commendation ang mga myembro sang amo nga grupo nagikan kay Governor Arthur Defensor, Jr. kag Provincial Disaster Risk Reduction and Management Office Head Dr. Jerry Bionat.
Kaupod man sa paghatag sang award pagkatapos sang flag ceremony sa Iloilo Provincial Capitol amo si Board Member Rolly Distura.
Sa interview sang Bombo Radyo kay Bionat, iya ginpahayag nga 14 ka mga personnel nagikan sa Emergency Responders of Iloilo ang ginpasidunggan, matapos man ang ila serbisyo sa pagbulong, paghakwat, pag-assist sa mga nalipong, mga hubog, mga nahapo, kag sa mga naglain ang pamatyag sang ginhiwat ang highlights sang Dinagyang Festival 2020.
Suno pa kay Bionat, ang amo nga mga responders ang nahanas gid indi lamang sa first aid kundi pati sa mountaineering kag jungle survival.
Gin-athag ni Bionat nga ang ginhatag nga Scout Roy Commendation ang nagakahulugan sang pagkilala sa ila bilang mga tawo nga nakabulig apang nagapabilin nga buhi, samtang ang Scout Roy Award naman ang ginahatag sa mga napatay nga tawo bagud sa pagserbisyo.
ISA KA BAGANIHAN
Kaangot diri, ginpakigbahin man ni Bionat nga ang Scout Roy Commendation ang ginlunsyar sa ngalan sang isa ka young hero kag iya anay scout buddy sa Estancia, Iloilo.
Suno kay Bionat, si Roy Babas amo ang isa ka 12 anyos nga maisog nga boyscout nga napatay samtang iya ginabuligan ang mga tawo nga nalunod sa isa ka barko sang 1971.
Bag-o napatay, naluwas ni Roy ang pito ka mga tawo.
Nahibaluan nga ginpromisa ni Bionat kay Roy nga patindugan niya ini sang memorial statue bilang pagkilala sang iya kaisog kag pagkabaganihan.
Gintuman ini ni Bionat matapos ang 41 ka tuig paagi sa isa ka memorial statue nga subong nahamtang sa Estancia Central Elementary School.
Nahibaluan man nga sang 2008, gin-organisa ni Bionat ang Emergency Responders of Iloilo ukon e-ROI, sunod man sa gihapon sa pangalan ni Scout Roy.
MGA PLANO
Kadungan man sang paghatag ang Scout Roy Commendation, naghatag man sang mensahe si Gov. Defensor sa diiin iya ginpahayag nga may yara sang plano nga buhion ang provincial guards sa idalum sang Provincial Civil Defense Group agud indi lang mag-serbe bilang security personnel sang Provincial Capitol kundi magrespondi man sa tion sang emerhensya.
