Ginsaylo ang anay TV host nga si Jay Sonza halin sa kustodiya sang National Bureau of Investigation (NBI) sa Pasay City pakadto sa pasilidad sini sa New Bilibid Prison.
Suno kay Atty. Mark Tolentino, legal counsel ni Sonza, maayo ang kondisyon sang iya kliyente kag padayon nila nga ginatutukan ang mga legal nga tikang agud maprotektahan ang iya mga kinamatarong.
Madumduman nga gin-aresto si Sonza sang Huwebes sang gab-i sa Quezon City bangod sa warrant of arrest nga ginpagwa sang Pasay Regional Trial Court Branch 118.
Ginpangatubang sini ang kaso nga paglapas sa Article 154 sang Revised Penal Code, nga naga-angot sa unlawful use of means of publication kag unlawful utterances sa idalom sang Cybercrime Prevention Act of 2012.
May kaangtanan ini sa gin-alegar nga pag-post sang fake news sang anay journalist nahanungod kahimtangan sang ikaayong lawas ni President Ferdinand Marcos Jr.
Sa tion sang iya pagka-aresto, ginpahayag ni Sonza nga handa ini magsunod sa due process.
Nauna na nga ginpahayag sang iya abogado nga kuwestiyunon nila ang pag-isyu sang non-bailable warrant batok sa iya ukon wala sang pyansa nga suno sa iya “highly irregular” ukon indi kinaandan para sa kaso nga may kaangtanan sa unlawful publication.
Dugang pa diri, ginapangatubang man ni Sonza ang separado nga kaso nga cyberlibel sa Pasay RTC Branch 111.
Gin-dayaw naman sang Presidential Communications Office (PCO) ang madasig nga tikang sang National Bureau of Investigation (NBI) sa pagpasaka sang kaso kag pag-aresto sa anay broadcaster.
