Ginhatagan sang tag-P100,000 kada isa ang duha ka mga katapo sang Philippine Navy nga nasamaran matapos ang agresibo nga aktwasyon sang China Coast Guard malapit sa Ayungin Shoal sa West Philippine Sea sang Hulyo 20.
Ginhatag ang bulig halin sa Special Financial Assistance kadungan sang pagbisita ni President Ferdinand Marcos Jr. sa Camp Ricarte Station Hospital sa sulod sang Western Command ukon WESCOM sa Palawan.
Suno sa Presidential Communications Office, ginkamusta sang president ang kahimtangan nanday Seaman First Class Underwater Operator Carmelo Aballe kag Private Eric Lacida.
Ginpasidunggan man ang ila kaisog kag sakripisyo sa pagdampig sang soberanya sang Pilipinas.
Si Aballe amo ang nakaangkon sang pilas sa ulo nga nagkinahanglan gid sang apat ka tahi, samtang si Lacida amo ang may gamay nga mga samad sa butkon.
Suno sa Philippine Navy, pareho sila nga yara sa estable nga kondisyon.
Bilang pagkilala sa ila serbisyo kag kaisog, ginkilala sila kag ginhatagan ni Marcos sang Order of Lapu-Lapu.
Ang ila nabaton nga P100,000 kada isa ang separado pa gid sa benepisyo nga ginahatag sa idalom sang Comprehensive Social Benefits Program sang Armed Forces of the Philippines.
Matandaan nga suno sa militar, napilasan ang duha ka miyembro sang Philippine Navy matapos ginpalapitan sang isa ka sakayan sang China Coast Guard ang BRP Sierra Madre sa Ayungin Shoal.
Sang ginsaway ini sang mga Pilipino nga soldado, gin-alegar nga ginhampak sila sang mga personnel sang China Coast Guard gamit ang kahoy nga baton nga nagresulta sa ila mga samad kag pagkaguba sang ila rubber boat.
