IVISAN, CAPIZ – Duha ang patay kag masobra 20 naman ang pilason matapos gin-arado sang 10-wheeler truck ang 28 ka mga salakyan sa Brgy. Poblacion Norte, Ivisan, Capiz.
Ang mga napatay biktima amo sanday Maricel Sargento, street sweeper, residente sang Barangay Poblacion Sur, Ivisan, Capiz kag isa pa gid ka senior citizen.
Ang driver naman sang truck amo si Ryan Bengan Molato, 39, residente sang Purok 8, Barangay Tarong, Carles, Iloilo.
Suno kay Police Major Ruby Magallanes, hepe sang Ivisan Municipal Police Station, nadulaan sang preno ang driver sang truck nga may karga nga hardware materials.
Naghalin ang truck sa Balasan, Iloilo kag padulong kuntani sa Kalibo, Aklan sang natabo ang aksidente.
Sakay naman sang truck ang apat ka pahinante.
Ini amo sanday, Orland Mercado Dumdumaya, 27, sang Barangay Mamhut NorteNorte, Balasan, Iloilo; Arvin Bantiling Bata-anon, 24, kag Raymund Bantiling De Asis, 27, lunsay residente sang Barangay Tingui-an, Balasan, Iloilo; kag Jeffry Valenzuela Belarmino, 28, residente sang Barangay Poblacion Sur, Balasan, Iloilo.
Posible naman nga magapangatubang ang driver sang truck sang kaso nga Reckless Imprudence Resulting to Homicide, Multiple Serious Physical Injuries and Damage to Properties.
Suno naman kay Mira Docallos, Municipal Social Welfare and Development Officer sang Ivisan, sabton sang local government unit ang tanan nga galastuhan sang mga napatay sa aksidente.
