Nagalaum ang Department of Health Region VI nga mabatak sa 75% sang target nga health personnel sa Western Visayas ang makumbinse nga magpabakuna gamit ang Sinovac coronavirus vaccine umpisa sa Lunes, Marso 8.
Ini bangud santo sa pinakaulihi nga record sang ahensya, 25% pa lang ukon 2,524 sang masobra 8,400 ka health personnel ang nagkumpirma nga batunon nila ang bakuna nga halin sa China.
Ini nga mga health personnel amo ang yara sa anum ka mga priority hospitals sa Western Visayas nga ginabug-usan sang duha sa syudad sang Bacolod nga amo ang Corazon Locsin Montelibano Memorial Regional Hospital kag Dr. Pablo O. Torre Memorial Hospital (ukon Riverside Medical Center) kag apat sa syudad sang Iloilo nga amo ang Western Visayas Medical Center, West Visayas State University Medical Center, Iloilo Doctor’s Hospital, kag Iloilo St. Paul’s Hospital.
Sa interview sang Bombo Radyo kay Dr. Mary Jane Juanico, pinuno sang Infectious Disease Cluster Unit sang DOH Region VI, iya ginpahayag nga ginhatagan tubtob 12:00 sa udto ang mga ospital agud ma-finalize ang numero sang mga health workers nga may consent nga magbaton sang Sinovac vaccine.
Ginalauman man nga makabulig sa pagpataas sang vaccine confidence ang maayo nga response sang mga health workers nga nabakunahan naman sa mga ospital sa Metro Manila.
Sa Lunes, Marso 8, magaumpisa ang vaccine rollout sa anum ka nasambit nga priority hospitals.
Ginasigurado man sang DOH nga indi madula ukon maguba ang vaccine potency paagi sa pag-store sini sa cold chain equipment nga may appropriate temperature. Gina-monitor man ang vaccines sa cold room apat ka beses sa isa ka adlaw.
Naga-coordinate man ang DOH sa Department of Energy agud indi madulaan sang elektrisidad ang regional cold room kag ang lugar sa ospital kun sa diin ginatago ang doses sang vaccine.
