BAROTAC VIEJO, ILOILO – Patay ang isa ka 29-anyos nga lalaki matapos nalumos sa tunga sang lawod sa Barangay San Francisco, Barotac Viejo, Iloilo.
Ang biktima amo si John Rex Balayo, residente sang nasambit nga lugar.
Sa interview sang Bombo Radyo kay Police Major Ken Albert Lepsia, hepe sang Barotac Viejo Municipal Police Station, iya ginpahayag nga naguba ang tangkal-tangkal ukon fish lift net nanday Balayo kag sang iya duha ka upod kahapon sang hapon.
Duha ka bes nga madinalag-on nga naka-dive si Balayo agud kay-uhon ang tangkal-tangkal sa idalom sang tubig apang sa ikatatlo nga tion, wala na ini nakabutwa.
Ginapahayag 30 ka minutos ang ginlawig sang pagpangita sa lawas sang biktima sa bulig sang Bureau of Fire Protection, Municipal Disaster Risk Reduction Office, kag sang barangay officials.
Kumbinsido naman ang pamilya nga wala sang foul play nga natabo bangud ginapahayag nga madugay na nga kilala ni Balayo ang duha niya ka kaupod sang natabo ang drowning incident.
