ILOILO CITY – Gin-ako sang Sta Barbara Municipal Police Station nga indi nila matan-aw sang maid-id ang tanan nga mga delivery trucks nga naga agi sa mga border checkpoints.
Ini matapos nga madakpan ang pila ka mga persona bangud sa pagpalusot sang makahulubog nga ilimnon sa checkpoint sa Brgy. Agutayan, Sta. Barbara, Iloilo
Sa interview sang Bombo Radyo kay Pol Maj Raymund Celoso, hepe sang Sta Barbara Municipal Police Station iya ginpahayag nga bangud man sa memorandum nga ginpagwa sang Inter Agency Task Force sa diin nakasaad nga nagakadapat nga indi madelay ang mga delivery trucks nga may dala nga essential goods.
Suno kay Celoso, nakasaad man sa memorandum nga nagakadapat nga may yara man sila sang fast lane para sa mga delivery truck agud indi ini madugayan rason kun ngaa indi sila makapadugay sa pagtsekyar sang mga unod sini.
Dugang sang natungdan, tubtob nga kumpleto ang mga papeles nga ginapakita sang mga driver kag pahinante mahimo na sila nga makalusot sa checkpoint.
Gin-athag ni Celoso nga ginasunod gid nila ang tanan nga mga pagsulundan apang indi sa gihapon malikawan nga may yara sang nagatinghuwa nga makalusot pa.
Nagpanugyan naman ang natungdan sa mga pumuluyo nga likawan na nga maglapas sa mga pagsulundan kaangay nalang sang pagpasulod sang mga kontrabando bangud sampaw-sampaw nga kaso ang posible nila atubangon
