Magatipon ang mga tiglawas sang masobra 30 ka mga pungsod sa Indo-Asia-Pacific region sa bulan sang Mayo para sa isa ka security conference sa tunga sang agresibo nga mga ginahimo sang China kag pagpang-bully sini sa kaiping nga mga nasyon.
Suno kay Gen. Charles Flynn, commanding general sang US Army Pacific, ginabanta 15 ukon 16 ka army chiefs lakip si General Lt. Gen. Roy Galido sang Pilipinas kag Gen. Yasunori Morishita sang Japan ang magatambong sa Land Forces of the Pacific Conference sa Hawaii halin sa Mayo 13-17.
Wala nalakip sa meeting ang pungsod China.
Madamo nga security issues ang istoryahan suno kay Flynn kag istoryahan man sang mga pinuno sang militar kun paano pasangkaron ang training, ang preparasyon, kag ang interoperability.
Nahibaluan nga diri mismo sa Manila si Flynn bangud sang linibo ka Pinoy kag American soldiers nga kabahin sang joint exercises ukon ang Balikatan sa West Philippine Sea.
Ini nga tuigan nga drills ang ginpatigayon kag ginsentro sa northern kag western parts sang Pilipinas nga malapit sa potential flashpoints sang West Philippine Sea kag Taiwan — mga teritoryo nga ginaangkon sang China.
Nakatutok man ang Balikatan subong nga tuig sa integrated air missile defense, cyber defense, kag iban pa nga drills nga magaserbe bilang deterrent batok sa mga pagpamahog halin sa luwas sang pungsod.#
(Photo: Indo-Pacific Defense Forum)
