ILOILO CITY – Ginpasakaan na sang kaso kriminal ang 35 ka mga indibidwal may kaangtanan sa oil spill sa Oriental Mindoro.
Ang complainants amo ang National Bureau of Investigation kag si Pola, Oriental Mindoro Mayor Jennifer Cruz.
Ang respondents ang nagapangatubang sang kaso nga falsification of public documents, use of falsified documents, kag perjury bangud sa gina-alegar pagpeke sang certificate of public convenience.
Lakip sa mga ginpasakaan sang kaso amo ang RDC Reield Marine Services, ang kompaniya nga nagapanag-iya sang MT Princess Empress nga amo ang rason sang oil spill, ang ship crew, personnel sang Philippine Coast Guard, kag ang Maritime Industry Authority.
Suno kay Justice Department spokesman Mico Clavano, ang directors sang RDC Reield ang ginapatihan nga may utok sang pagpeke sang dokumento bangud nga sila ang nagakapot kag naghimo sini.
Sila man ang nagbenipisyo sa paggamit sang falsified document.
Samtang, ang Philippine Coast Guard ang may salabton bangud sila ang nagapatigayon sang pre-departure inspections sa domestic oil tankers antes maglayag.
Obligasyon man nila nga tsekyaron ang validity sang certificate of public convenience.
Ginpahayag pa ni Clavano nga ang iban nga dokumento nga ginpeke amo ang construction certificate, tonnage measurement certificate, certificate of ownership, kag certificate of Philippine registry.
Suno sa iya, ang mga opisyal sang Maritime Industry Authority kag sang RDC ang naghimbon sa iligal nga pagrehistro sang MT Princess Empress gamit ang peke nga dokumento.
Suno naman kay Justice Undersecretary Raul Vasquez, base sa construction certificate, tonnage measurement certificate, kag sa certificate of Philippine Registry, ang MT Princess Empress ang ginapahayag ginhimo sa Bataan.
Apang sa pagkamatuod, ini ang ginhimo sa Navotas.
Pahayag ni Vasquez, base sa polisa sang Maritime Industry Authority, ang opisina sang Marina Regional Office nga maga-certify sa barko ang dapat nga nahamtang man sa lugar kun sa diin ginpatigayon ang pag-ubra sang barko ukon ang head office sang tag-iya sang barko ukon branch sini.
Base sa imbestigasyon, ang nagpirma amo ang mga opisyal sang Region V.
Ginatun-an man ang posible pagpasaka sang environmental crimes kag graft corruption charges sa masunod nga mga semana.
Nagpanindugan naman ang RDC nga ang MT Princess Empress ang bag-o gid lamang gin-ubra kag nagsunod sa tanan nga pagsulundan nga gin-set sang Maritime Industry Authority.
Sa bahin naman sang Philippine Coast Guard, ginpahayag sang spokesperson nga si Rear Admiral Armand Balilo nga nagahulat pa sila sang official document antes magpagwa sang statement.
Kung madumduman, ang MT Princess Empress ang naglugdang sang Pebrero 28 sa Naujan, Oriental Mindoro samtang nga nagakarga sang 900,000 liters sang industrial fuel.
