Nagbawi sang ila statement ang apat sa mga nagpakilala nga former bodyguards ni anay Ako Bicol party-list Rep. Zaldy Co.
Nagpirma sila sang affidavit agud nga ma-retract ukon mabawi ang nauna nga ginsumpaan nga mga pahayag sang Hulyo 3, 2026 batok kanday President Ferdinand “Bongbong” Marcos, Jr., former Speaker kag subong Leyte Rep. Martin Romualdez, Co, kag iban pa nga mga personalidad.
Suno sa apat, gusto lang nila nga magpangabuhi sang malinong.
Base sa ila nga testimoniya, nagpirma sila sa nauna nga joint affidavit bangud may ginpromisa sa ila nga financial assistance. Ginapahayag nga ang ginpromisa sa ila nga kantidad ang bastante na bisan nga indi sila magtrabaho sa sulod sang duha ka tuig, kag hatagan man sila sang seguridad.
Gin-alegar man nila nga sang nag-abot na sila sa Ombudsman, pilit sila nga ginpapirma sang affidavits nga preparado na nga daan.
Gin-alegar man nila nga ginpaandaman sila nga pasakaan sang sampaw-sampaw nga kaso kun magbalibad sila.
Suno sa isa sa mga ginsapubliko nga affidavit, nagpasugot siya nga mangin kabahin sang grupo nga “18 Marines” agud nga makapangilkil ukon makapang-blackmail. Ini agud suno sa affidavit makapangayo sang kwarta halin sa mga tawo nga ginakabig nila nga kurap, bangud nagapati sila nga magabayad ang mga tawo nga ila kilkilan para nga pahipuson sila.
Ginpahayag man nila nga sunod gid sa ila kaugalingon nga kagustuhan ukon free will ang bag-o nga affidavit nga ila subong gin-execute agud bawion ang ila nauna nga statements.
Nagpangayo man sila sang pasaylo sa mga na-ulamid nga pangalan bangud sa ila statement.
Ginahulat pa ang mangin opisyal nga pahayag sang Ombudsman kag sang abogado sang alleged ex-bodyguards nga si Atty. Levito Baligod.
Una nga nagpakita sa publiko ang 18 ka ginaalegar former security personnel ni Co sadtong Pebrero 2026. Nag-execute sila sang affidavits kun sa diin nakasaad nga nagdul-ong sila sang mga maleta nga may kwarta kay Marcos, Romualdez, iban pa nga mga kongresista, kag dalagku nga mga personalidad.#
