Ginduso ni Senator Francis “Chiz” Escudero ang hagna nga nagatuyo nga palawigon ang termino sang Barangay and Sanguniang Kabataan (SK) officials halin sa apat pakadto sa lima ka tuig.
Sa idalom sang Senate Bill Number 2387, ginaduso man nga sayluhon sa Nobyembre 2028 ang sunod nga Barangay kag SK Elections halin sa orihinal nga schedule sini sa Nobyembre 2026. Pagkatapos sini, patigayunon na ang eleksyon sa kada lima ka tuig.
Suno kay Escudero, ang katuyoan sang hagna amo ang pagpalig-on sang “stability and consistency” sa paghatag sang serbisyo publiko sa lebel sang barangay.
Pahayag sini, mas mangin malawig ang tiyempo sang mga lokal nga opisyal sa pagpatuman sang mga programa para sa kauswagan sang ila komunidad kag malikawan ang masami nga paguntat sang mga proyekto bangud sang masami nga eleksyon.
“Such intervention would promote continuity in governance, provide sufficient time for community development initiatives, reduce disruptions caused by frequent electoral exercises, and enable local officials to focus on public service rather than on electoral cycles,” suno sa iya explanatory note.
Sa idalom sang hagna, madugangan sang duha ka tuig ang termino sang mga nagapungko subong nga barangay kag SK officials bilang kabahin sang transitory provision.
Ginasiling man sa hagna nga ang mga incumbent barangay officials nga nakaserbe na sang tatlo ka sunod-sunod nga termino sa amo man nga posisyon indi na mahimo nga magpadalagan liwat sa amo nga pwesto sa Barangay kag SK Elections sa 2028.
“Voluntary renunciation of office for any length of time shall not be considered as an interruption in the continuity of service for the full term for which the elective official was elected,” kabahin pa sang iya paathag.
Gin-retain naman sa hagna ang existing term limits nga nagatugot sang tatlo lamang ka sunod-sunod nga termino para sa mga barangay officials sa amo nga posisyon, samtang isa lamang ka termino ang ginatugot para sa mga opisyal sang Sangguniang Kabataan.
Nahibaluan nga padayon subong ang preparasyon sang Commission on Elections (COMELEC) para sa eleksyon nga matabo sa Nobyembre 2 magluwas lang kun mapasar kag maaprubahan ang ginaduso subong nga measures.#
