ILOILO – Dakop ang apat ka tumandok sang Capiz sa ginpatigayon nga drug buy-bust operation sang Regional Drug Enforcement Unit (RDEU) sa Block 23, Lot 17, Phase 1, Deca Homes sa Balabag, Sta. Barbara, Iloilo.
Ang mga arestado amo sanday Jan Herbert Roxas, 43-anyos sang syudad sang Roxas; Rudini Arabacan, 36-anyos sang Brgy Cagay, Roxas City; Hersky Cabaslo, 43-anyos sang Poblacion Ilawud, Dumarao Capiz; kag, Roseler Villalba, 39-anyos sang Poblacion Ilaya, Dumarao, Capiz.
Nakuha sa possession sang mga suspek ang 19 ka sachet sang suspected shabu kag santo sa inisyal nga pahayag sang otoridad, ginabanta kapin P2 million ang balor sang recoveries.
Suno sa team leader sang RDEU, kapin isa na ka bulan nga gina-monitor ang nasambit nga mga suspek. Ginpahayag nga nagikan sa syudad sang Roxas ang suplay sang iligal nga droga.
Sa interview sang Bombo Radyo sa isa sa mga arestado nga si Hersky Cabaslo, iya ginpahayag nga wala siya sang kahilabtanan sa amo nga operasyon.
Pahayag sang natungdan, naabtan lang siya sang lockdown sa banwa sang Sta. Barbara amo nga nagtrabaho siya bilang manugkay-o sang kudal kag iban pa apang natalana na kuntani nga magbalik sa banwa sang Dumarao bangud wala na sang border restrictions umpisa sang ginpaidalom ang probinsya sa Modified General Community Quarantine sang Lunes, Hunyo 1.
Preso subong ang apat ka suspek sa Sta. Barbara Municipal Police Station.
