Apat ka retirado nga mahistrado sang Supreme Court ang magaserbe nga amici curiae ukon “friends of the court” sa impeachment trial ni Vice President Sara Duterte kag magahatag sang ila legal nga panan-awan kaangot sa 16-vote threshold para sa conviction.
Suno kay Senate Impeachment Court spokesperson Reginald Tongol, nakumpleto na sang korte ang pormal nga pag-partisipar sang apat ka retirado nga mahistrado, kag tatlo sa ila ang personal nga magaatubang sa impeachment court sa September 16.
“The Impeachment Court is not leaving constitutional math to guesswork or chance,” suno kay Tongol.
“The Impeachment Court reserves its plenary prerogative to invite additional experts should the situation demands it—so this four-man roster constitutes the Court’s list of amici curiae thus far,” dugang sini.
Ini nga amici curiae amo sanday retired Chief Justice Artemio V. Panganiban, retired Chief Justice Reynato S. Puno kag retired Associate Justice Adolf S. Azcuna.
Magapartisipar man si retired Chief Justice Hilario G. Davide Jr., nga nangin presiding officer sang impeachment trial ni anay President Joseph Estrada sang 2000, apang magasumiter siya sang legal memorandum sa baylo nga personal nga magaatubang.
Suno kay Tongol, mahimo pa mag-imbitar ang impeachment court sang dugang nga mga eksperto, samtang indi anay sini pagpagwaon ang mga detalye sang mga legal advisory nga gin-submit sang mga retirado nga mahistrado.
Sa September 16 proceedings, ipresentar sang tatlo ka retirado nga mahistrado nga personal nga magaatubang ang ila legal advisories, samtang ang memorandum ni Davide ipasulod sa official record, kag ang mga senator-judge lamang ang tugutan nga magpamangkot para sa clarification.
Sa September 23, hatagan sang tig-15 minutos ang House prosecution panel kag ang kampo ni Duterte para sa oral arguments parte sa appeal, antes magaboto ang impeachment court sa isyu sang voting threshold.#
