Masobra 40 ang patay kag masobra 100 ang pilason sang ginpangluthang sang lima ka armado nga kalalakinhan sa concert sa Crocus City Hall malapit sa Moscow sa Russia.
Sandig sa inisyal nga impormasyon, nagsugod mismo ang shooting sa concert sang banda nga popular rock band nga “Picnic”. Bangud sa pagpalupok kag pagsigabong, natabo ang stampede.
Ginpahayag nga natabo man ang sunog sa amo nga concert venue.
Indi pa maathag kun sin-o ang responsable sa amo nga krimen apang suno sa top investigative agency, isa ini ka terrorist attack.
Suno naman sa Russian news agencies, 70 ambulance crews ang ginpadala sa area kun sa diin natabo ang insidente.
Kasunod sang insidente, ginkanselar man ang tanan nga entertainment and mass events sa amo nga pungsod.
Natabo ini pila ka adlaw matapos naeleher liwat sa pwesto si Russian President Vladimir Putin kag samtang nagapadayon ang atake sang Russia sa Ukraine.
