Ginabanta 50 ka tawo ang ginpang-detain sang mga pulis sa Turkey kadungan sang tuigan nga Pride March nga ginpatigayon sang LGBT community.
Suno pa sa Amnesty International-Turkey office, isa ang nakaangkon sang head injuries sang gin-detain sang otoridad.
Sang ginpatigayon ang pride march sang weekend, nagbutang ang mga pulis sang barikada sa central Taksim Square kag sa Istiklal Avenue nga amo ang tradional nga venue sa Pride march. Ginsuspinde man ang operasyon sang pampubliko nga mga salakyan.
Indi banned ang homosexuality sa Turkey, apang lapnagon ang pagpakamalaot kag mas nagaistrikto pa ang pagbantay sang mga pulis sa pride marches sa kada tuig.
Ginpahayag man sang organizers nga ang LGBT amo gid ang target ni President Tayyip Erdogan.
“We don’t accept this hate and denial policy,” kabahin sang statement sang Istanbul LGBTI+ Pride Week. #
