Nag-abot na sa Pilipinas kahapon, Mayo 9, ang 60 ka overseas Filipino workers (OFWs) halin sa Israel nga amo ang pinakadaku nga batch sang Pinoy repatriates halin sang nagsugod ang Israel-Hamas war.
Suno sa Department of Migrant Workers (DMW) kag sa Overseas Workers Welfare Administration (OWWA), bangud sa pagdugang sini nga numero, nagdangat na sa 879 ka mga Pilipino ang nabuligan sang gobyerno nga makapauli sa Pilipinas samtang nagalala ang tensyon sa tunga sang Israel kag sang militante nga grupo.
Ginpahayag nga may isa ka OFW nga wala nakasakay sa eroplano kag napaslawan nga makapauli sa Pilipinas bangud naglain ang pamatyag sini. Gindala ini sang Philippine Embassy and Migrant Workers Office—Abu Dhabi officers sa ospital para ma-check ang iya nga kondisyon.
Pananglitan mag-ayo na ang pamatyag sini, magabulig ang talatapan para nga makabyahe na ini pabalik sa nasyon.
Oktubre 2023 sang nagsugod ang Israel-Hamas war apang tubtub subong padayon ang pagtimalos sang Israel paagi sa pagsalakay sa Gaza Strip. Amat-amat naman ini nga naintrahan sang iban nga mga pungsod rason sang pagsaka sang tensyon sa Middle East.
Matandaan nga ginbatak man sang Department of Foreign Affairs (DFA) sa Alert Level 2 ang status sa Israel para sa safety sang 27,000 ka Filipinos sa amo nga lugar — buot silingon, ginapahanumdom sa ila ang restriction sa non-essential movements, likawan ang mga lugar nga may protesta, kag maghanda sa posible nga pagbakwit.#
