Kun grabe ang imo pagdayaw kag pag-idolo sa isa ka artista, ma-imagine mo ayhan ang imo reaksyon kun isa ka adlaw, i-chat ka niya kag halos adlaw-adlaw na kamo naga-istoryahanay?
Indi mo gid mabasol ang 63-anyos nga Lola nga si Guadalupe Cepeda didto sa Los Angeles, USA kun nga grabe gid ang iya kilig sang natabo ini sa iya.
Ang iya idol sa sulod na sang duha ka dekada amo ang Spanish musician nga si Enrique Iglesias nga isa sa best-selling Latin music artists.
Miyembro si Lola Guadalupe sang isa ka online fan page ni Enrique.
Isa ka adlaw, may nag-message sa iya nga nagpakilala nga si Enrique, kag bangud miyembro siya gani sang fans sini, wala na siya nakibot kun ngaa siya gid ang ginpili nga istoryahan.
Bisan kasado si Lola Guadalupe kag buhi pa ang iya bana, nakabatyag gid siya sang tuman nga kilig tubtub nga nahulog gid ang iya buot kay Enrique.
Sa malawig nila nga pag-istoryahanay, nagplano na si Lola Guadalupe nga bulagan sini ang iya bana, kag mag-upod sa Spanish superstar.
Planado na ini sa iya pinsar, apang antes ina natabo, namutikan niya nga ginapangayuan siya sang kuwarta.
Bangud palangga sini si Enrique, nagpadala man siya, apang bangud pirme ini nagakatabo kag dolyar-dolyar na ang nadula sa iya, nagprangka siya nga wala na siya sang kuwarta.
Ginsugo pa siya sang superstar nga magpangawat sa iya bana kun gusto gid sini nga mag-updanay sila sa ulihi.
Nadiskubrehan naman sang bana nga si Martin Perez nga may “affair” ang iya asawa sang nabukaran ang iya cellphone.
Siyempre ang lauman mo amo nga ma-akig siya, apang labaw sa kaakig, nangin mas mabudlay para sa iya nga papatihon ang iya asawa nga indi si Enrique ang iya ka-istorya kundi isa ka scammer.
Bisan na-locate na ang scammer nga taga-Nigeria, indi gid magpati si Lola Guadalupe bangud tuman niya ini ka palangga.
Gindala na ang istorya sa telebisyon ang istorya, kag nahibal-an na sang halos tanan ang relasyon ni Lola Guadalupe sa scammer nga nagapakuno-kuno nga si Enrique.
Didto man nagpanawagan ang bana kay Enrique nga kun mag-abot man sa iya ini nga istorya, kuntani makumbinse sini si Guadalupe nga nabiktima lamang ini sang scam kag indi matuod nga magkarelasyon sila nga duha.
Ini ini ang una nga bes nga may nabiktima sang scam nga kaangay sini, bangud may 63-anyos man anay nga French woman nga nadulaan sang daku nga kantidad sang kuwarta bangud ginpadala man sini sa iya karelasyon nga ginpatihan sini nga amo ang Hollywood heartthrob nga si Brad Pitt.
