GUIMARAS – Naglab-ot na sa 67 ang kaso sang Human Immunodeficiency Virus (HIV) sa probinsya sang Guimaras subong nga tuig.
Sa interview sang Bombo Radyo kay Zenard Dela Cruz, health education and promotion officer sang Guimaras Health Office, iya ginpahayag nga sa ila narecord nga kaso, 65 ang lalaki, kag duha ang babayi.
Suno kay Dela Cruz, ini nga data ang mas mataas ipaanggid sang nagligad nga tuig.
Nahibaluan nga may ara 21 ka kaso sa Buenavista, 28 sa Jordan, anom sa Nueva Valencia, anom sa San Lorenzo, kag anom man sa Sibunag.
Sa sini nga mga kaso, suno kay Dela Cruz, 32 ang ginakabig bisexual, 16 ang homosexual, kag 19 ang heterosexual.
Iya ginpahayag nga boluntaryo nga nagakadto sa ila ang pumuluyo para sa HIV testing.
Bilang panugyan, ginsiling sang natungdan sa publiko nga dapat gid sundon ang ginarekomenda nga ABCDE method nga nagakahulugan: Abstinence, Be mutually faithful, Consistent and correct use of condom, Do not use drugs, kag Early detection and education.
