GUIMARAS– Kulang sa gihapon ang ayuda nga nabaton sang mga manugpangisda sa Barangay Igang, Nueva Valencia, Guimaras kapin isa ka tuig matapos ang lapnagon nga oil spill sa kalalawran sang Iloilo kag Guimaras.
Sa interview sang Bombo Radyo kay Punong Barangay Divina Inoceto, iya ginpahayag nga 22 sa iya mga pumuluyo nga manugpangisda ang nag-apply para sa cash assistance nga halin sa AC Energy.
Sa sini nga numero, 7 pa lang ang nahatagan sang tag-P7,700 nga ayuda.
Suno kay Inoceto, ginpahibalo siya nga gina-validate pa ang papeles sang 15 ka iban pa nga applicants apang wala sang ginpasalig nga petsa kun san-o ihatag ang kwarta.
Ang Barangay Igang sa Nueva Valencia ang isa lamang sa mga coastal barangays sa Guimaras nga apektado sang oil spill sang naglupok ang power barge sang AC Energy sa Barangay Bo. Obrero, Lapuz, Iloilo City sang Hulyo sang nagligad nga tuig.
