Ginpangunahan ni Armed Forces of the Philippines (AFP) chief General Romeo Brawner Jr. ang pagkilala sa pito ka mga soldado sang 6th Infantry Division nga napilasan sang natabo ang military operation batok sa mga katapo sang Bangsamoro Islamic Freedom Fighters (BIFF) Karialan Faction sang Abril 22 sa Datu Saudi Ampatuan, Maguindanao del Sur.
Ginpasalamatan ni Brawner ang dedikasyon kag ang sakripisyo sang militar agud nga masigurado ang kalinong kag seguridad sa rehiyon.
“He assured them of the AFP’s unwavering support and pledged to ensure that they receive the best possible medical care and assistance in their recovery,” kabahin sang statement sang AFP.
Matandaan nga sa amo nga operasyon sang nagligad nga Lunes, napatay sang militar ang highest-ranking leader sang BIFF – Karialan Faction nga si Mohiden Animbang alias Kumander Kagui Karialan.
Pila ka tuig na nga wanted si Karialan kag sunod-sunod man ang operasyon sang militar batok sa iya bangud ang iya grupo ang ginakabig nga kaalyado sang Islamic State of Iraq and Syria (ISIS) terror group kag isa ka daku nga pagpamahog sa seguridad sang banwa.
Nagdangat man sa13 ka high-powered firearms ang nakuha gikan sa napatay nga mga rebelde.
Nahibaluan nga ang grupo nga Karialan ang ginatudlo nga responsable sa pagpamomba kag pag-atake sa tropa sang gobyerno kag may kahilabtanan man sa mga kalakasan sa Bangsamoro region.#
