ILOILO CITY – Gindagdagan na sang relief order ang mga high-ranking officials sang Bureau of Fire Protection (BFP) Region 6 nga naglapas sa quarantine protocol kag nag-party sa Antique kag Boracay upod ang isa ka coronavirus disease 2019 (COVID-19) positive nga firewoman.
Ang bureau relief order ang ginpirmahan ni Fire Chief Jose Embang Jr. kahapon, Hunyo 18.
Sa interview sang Bombo Radyo kay Fire Senior Inspector Stephen Jardeleza, tagpamaba sang Bureau of Fire Protection Region 6, iya ginpahayag nga 7 sa 28 ka mga personnel sang pamunuan ang ginpahalin sa pwesto.
Ini amo sanday:
- Supt. Allan Agarin – anay Chief sang Logistics Division kag iga-designar sa Office of the General Support Service sa BFP National Headquarters;
- Supt. Aldwin Salazar – anay assistant regional director for operations kag iga-designar sa Office of the General Support Service sa BFP National Headquarters;
- Supt. Nazrudyn Cablayan – anay Provincial Fire Marshal sa Aklan kag iga-designar sa Office of the General Support Service sa BFP National Headquarters;
- SFO1 Ralph Liban – yara anay sa Office of the Engineering and Maintenance Section, Logistics Division kag iga-designar sa Office of the Regional Director sa National Capital Region;
- FO2 Marvin Gerzaniva – yara anay sa Office of the Information Technology kag iga-designar sa Office of the Regional Director sa National Capital Region;
- SFO4 Gene Aragona – anay Officer-in-charge sang Fire Control Operations Section kag iga-designar sa Office of the Regional Director sa National Capital Region; kag
- SFO2 Jonathan Hungriano- anay deputy sang Health Service Section kag iga-designar sa Office of the Regional Director sa National Capital Region
Sa pihak nga bahin, apisar wala sang kahilabtanan sa kontrobersyal nga pag-breach sa quarantine protocol, gin-relieve man sa pwesto bilang Provincial Fire Marshall sang Negros Occidental si Fire Senior Supt. Pamela Candido, asawa ni incoming BFP Region 6 Director Fire Senior Superintendent Jerry Candido.
Ini bilang pagsunod sa pagsulundan sang pamunuan may kaangtanan sa mga mag-asawa sa isa ka rehiyon kun sa diin kinahanglan i-relieve ang isa bangud indi mapirmahan sang regional director ang mangin performance rating sang iya asawa.
