Nag-file na sang counter affidavit kag motion for reconsideration ang mga opisyal sang Anti-Red Tape Authority (ARTA) matapos nga gindagdagan sang Office of the Ombudsman sang anum ka bulan nga suspension kasunod sang kaso nga graft charges nga nag-ugat sa pagpili sang bag-o nga telco player sa Pilipinas.
Suno kay ARTA Director General Jeremiah Belgica nga isa man sa gin-isyuhan sang preventive suspension, indi sila kurap kag ginahimo lang sang ARTA ang ila nga trabaho.
Ginpaathag man sini nga ang preventive suspension nga ginpapanaog sa ila ang wala nagakahulugan nga guilty sila sa amo nga kaso.
Buot silingon sini, katuyuan lang sang suspension nga guwardyahan ang tanan nga dokumento agud nga indi maimpluwensyahan ukon maintrahan sang mga tawo nga nalakip sa gina-imbestigaran.
Matandaan nga lakip sa gin-isyuhan ni Ombudsman Samuel Martires sang anum ka bulan nga suspension amo sanday Belgica, Deputy Director General Eduardo Bringas, Division Chief Sheryl Pura-Sumagui, Director Jedreck Ng, kag Director Melamy Salvadora-Asperin.
Ang nag-file sang kaso amo ang telecommunications firm nga DITO Telecommunity Inc.
Gin-alegar sini nga naghatag pabor ang ARTA officials sa NOW Telecom Company Inc. sang nagpili ini sang New Major Player (NMP) para sa telecom industry sang pungsod.
Sa bahin sang ARTA, ginpaathag ni Belgica nga indi sila ang responsable sa approval of applications ukon bisan sa pag-provide sang frequencies ukon provisional authority.
Ang gahum lang sang ARTA suno kay Belgica amo ang pag-check kun kumpleto ang ginasumite nga mga dokumento kag kun ano ang wala gina-aktuhan.
Gina-check man suno kay Belgica kun nabayaran na ang wala pa mabayaran agud nga maaprubahan na ang ila nga gina-aplayan kag agud mahibaluan kun may kakulangan ang ahensya.
Ginpahayag man ni Belgica nga magatuman sila sa suspension order apisar nga wala pa ini naserbe sang office ni Executive Secretary Salvador Medialdea.
