ILOILO CITY- Ginpa- Bombo sang mga pumuluyo ang dalan sa Brgy. Duyan-duyan, Sta. Barbara, Iloilo bangud nga wala matapos ang costruction sini rason nga ginaantos sang mga tawo ang tuman ka damo nga yab-ok sa lugar.
Sa interview sang Bombo Radyo kay Mace Espino, residente sa lugar, iya ginpahayag nga madamo na nga mga kabataan ang nagamasakit kag nag-angkon sang problema sa respiratory system kun sa diin may yara pa gani sang na-admit sa ospital bangud sa halit sang yab-ukon nga dalan.
Suno kay Espino, bisan ang pagpanghalay sang ila mga linabhan ang apektado man bangud kinahanglan nila ipalayo sa dalan agud indi mapuno sang yab-ok ang ila mga bayo.
Suno naman kay Barangay Kagawad Edgar Maciado, base sa project billboard, Hunyo 5,2023 nagsugod ang proyekto kag Marso 15,2014 ang target date of completion apang humalin sang Disyembre, ginbayaan ini sang kontraktor bangud nga wala pa ma-settle ang balaydan sa mga tag-iya sang duta nga apektado sang proyekto.
