Ginalantaw sang Philippine Atmospheric, Geophysical and Astronomical Services Administration (PAGASA) nga walo tubtub onse ka mga bagyo ang magasulod sa Philippine Area of Responsibility (PAR) subong nga tuig.
Suno kay PAGASA weather specialist Rusy Abastillas, isa diri ang posible nga mag-abot sa bulan sang Abril, isa tubtub duha sa Mayo kag Hunyo, kag duha tubtub tatlo halin sa Hulyo tubtub sa Septyembre.
Ginsiling man sini nga ang kalabanan nga parte sang Luzon ang maka-eksperyenyensya sang below normal rainfall, apang malapit tubtub above normal rainfall naman sa eastern kag southern Luzon, sa Visayas kag sa Mindanao.
Dugang sini, nagsugod na sa paghina ang El Niño kag posible nga magbalik na ang ENSO-neutral conditions halin sa Abril tubtub sa Mayo ukon ang kondisyon nga nagakahulugan nga wala na sang El Niño kag amat-amat naman nga nagasulod ang La Niña.
Apisar nga nagahina na ang El Niño, ginsiling naman sang Task Force El Niño nga ang mga areas nga mahimo maigu sang dry spell ukon drought ang mahimo magsaka sa masunod nga tatlo ka bulan.
Suno kay Task force spokesman Joey Villarama, posible nga maka-eksperyensya sang dry spell, dry condition kag drought ang 67 ka mga probinsya sa Ilocos, Cagayan Valley, Central Luzon, Calabarzon, Mimaropa, Zamboanga peninsula, Western Visayas kag Soccsksargen.
Sa sini nga 67, 30 ang ginalantaw nga makabatyag sang drought.
Kritikal man suno sa iya ang masunod nga tatlo ka bulan bangud pasulod na ang Pilipinas sa dry ukon summer season.#
