ILOILO CITY – Natukiban sang Office of the Building Official (OBO) nga wala sang building permit ang kalabanan nga proyekto sang Department of Public Works and Highways – Iloilo City District Engineering Office (DPWH-ICDEO).
Sa interview sang Engineer Mavi Gustilo, head sang nasambit nga opisina, iya ginpahayag nga santo sa ila record, nagwa nga humalin sang nagligad nga tuig tubtob subong, ginpadayon sang Iloilo City District Engineering Office ang mga proyekto apisar nga kulang pa ang mga dokumento.
Suno kay Gustilo, humalin sang 2023, sa 45 ka mga proyekto sang DPWH-ICDEO, walo lang ang ginpasa nga application para sa building permit.
Apang sa nasambit nga numero, duha lang ang naaprubahan.
Ginpahayag ni Gustilo nga gintugyan na sang DPWH-ICDEO ang pagkuha sang building permit sa mga contractor.
Gin-athag man sang natungdan nga importante ang building permit, bangud ini ang pamatuod nga nakapasar sa ila standard ang proyekto nga ipatukod.
