ILOILO CITY- Ginapreparar na sang Local Government Unit sang Oton ang paghatag sang bulig-pinansyal sa mga biktima sang buhawi nga naglaslas sa duha ka barangay sa amo nga banwa kag ginkaguba sang 80 ka mga pamalay.
Ini amo ang barangay Alegre kag San Nicolas.
Sa interview sang Bombo Radyo kay Dr. Jerry Bionat, pinuno sang Provincial Disaster Risk Reduction and Management Office, iya ginpahayag nga magluwas sa local government unit, handa man nga maghatag sang additional financial assistance ang provincial government paagi sa Assistance to Individuals in Crisis Situation program.
Base sa data sang opisina ni Bionat, 18 ka mga balay ang totally damaged sa Alegre samtang walo naman ka mga balay ang totally damaged kag ang 54 naman ka mga balay ang partially damaged sa San Nicolas.
Nahibaluan nga magluwas sa duha ka barangay sa Oton, gin-igo man sang buhawi ang Brgy. Sta Cruz kag Sto. Domingo sa Arevalo, Iloilo City.
Nagpaandam naman si Bionat sa mga residente sang Oton kag iban pa nga banwa sa probinsya sa posibilidad nga masulit ang pag-igo sang buhawi bangud nga yara sa tornado alley ukon alagyan sang buhawi ini nga mga banwa.
