ILOILO CITY– Nag-abot na sa Pilipinas ang 80 ka tonelada sang pagkaon nga gindonar sang United Arab Emirates (UAE) government nga ginpangunahan sang ila President nga si Sheikh Mohamed bin Zayed Al Nahyan, para sa mga biktima ni Typhoon Carina.
Karga ini sang 747-200 cargo plane nga naghugpa sa Ninoy Aquino International Airport kagab-i.
Ang cargo nagaunod sang bugas, kalamay,gatas, kag iban pa nga pagkaon.
Ini ang pinakauna nga food aid nga na-abot sa pungsod humalin sang naglaslas ang bagyo nga si Carina nga nagresulta sa lapnagon nga baha sa Metro Manila.
Mismo si Social Welfare and Development Secretary Rex Gatchalian ang nagbaton sang food aid kaupod si Interior and Local Government Secretary Benhur Abalos, kag Presidential Special envoy for trade and investment with the UAE Kathryna Yu-Pimentel.
Sila ang gin-updan ni UAE Ambassador to the Philippines Mohamed Obaid Alqataam Alzaabi.
