Gindeklarar sang Israel ang kadalag-an sang ila nga depensa kasunod sang direkta nga atake sang Iran kun sa diin yara sa 300 ka mga drones kag cruise kag ballistic missiles ang ginpalupad pasado 11:00 sa gab-i sang Sabado (oras sa Israel).
Suno sa Israel Defense Forces (IDF), 99% sang sini nga mga drones kag missiles ang nasagang sang ila nga pwersa sa bulig sang ila mga kaalyado lakip ang Estados Unidos sang Amerika, United Kingdom, kag Jordan.
Ginkumpirma man sang Israel nga may pila ka missiles nga nakatupa gid sa ila nga teritoryo nga amo ang naghalit sa Nevatim airbase sa south nga bahin sang pungsod, apang nagapabilin ini nga operational.
Suno pa sa militar, nagapabilin nga kritikal ang masunod nga 24 ka oras samtang nga ginabalanse sang pungsod ang ila mga tikang agud balusan ang Iran. Indi pa maathag subong kun ano ang plano apang may government official nga nagsiling nga nakasugtan sa war Cabinet meeting kag deliberasyon nga magabalos ang ila pungsod.
Sa pihak nga bahin, ginsiling naman sang senior administration official nga nagkumpirma si US President Joe Biden kay Israeli Prime Minister Benjamin Netanyahu paagi sa tawag sa telepono nga indi magpartisipar ang Amerika sa anuman nga operasyon sang Israel bilang balos nila sa atake sang Tehran. Ginpahayag sang White House nga indi na sini gusto magdaku ang gamo sa Middle East.
Nahibaluan nga ang atake sang Iran ukon ang air raids nga amo ang labing-una nila nga direkta nga atake sa estado sang Israel ang ginhimo bilang pagtimalos sa ginapatihan nga Israeli airstrike sa ila consular building sa Syria sang Abril 1 nga ginkamatay sang Iranian top commanders.
Nagpaandam naman ang Tehran nga pananglitan magbalos pa ang Israel, mas makusog ang ila mangin atake.#
Photo: Amir Cohen/Reuters
