Simbahan sa Senado: 'Mangisog' magpamatok sa Death Penalty Bill'

Ginpakamalaot sang Simbahan Katolika ang pagsuporta sang mga miyembro sang Kamara sa Death Penalty Bill.
Sa interview sang Bombo Radyo kay Monsignor Meliton Oso, director sang Jaro Archdiocesan Social Action Center (JASAC), ginkasubo sini ang pagkambyo sang mga mamalidha nga sadto anay nagapamatok sa pagpatuman sang silot nga kamatayon.
Suno kay Oso, maathag nga nahadlok ang mga mamalidha nga indi paghatagan ni Presidente Rodrigo Duterte sang budget para sa ila proyekto rason nga nagsuporta sa death penalty nga luyag sini ipatuman.
Ginpanindugan ni Oso nga santo sa Bibliya, ang Diyos lang ang mahimo nga magkuha sang kabuhi sang tawo.
Gin-athag man ni Oso nga ang kabuhi ang utang sa Diyos kag indi kay Duterte ukon sa husgado.
Indi sa tanan nga oras suno kay Oso, patas ang laye ukon nagasugid sang matuod ang mga testigo kag indi sa tanan nga ti-on husto ang desisyon sang mga husgado.
Nagalaum ang Simbahan nga indi pagsuportahan sang Senado ang hagna.
Ginpahayag ni Monsignor Oso nga indi kaangay sang Kamara, mas bukas ang Senado sa ila pagpamatok sa ginaduso nga laye.
Nagalaum si Oso nga mangin maisog ang oposisyon sa Senado nga pamatukan ang pagbuhi sa silot nga kamatayon.