Ex-mayor sang Barotac Nuevo, Iloilo ginpamatbatan sang Sandiganbayan nga mapreso

ILOILO CITY – Ginpamatbatan sang Sandiganbayan sang 18 tubtob 24 ka tuig nga pagkapreso ang anay alkalde sang Barotac Nuevo, Iloilo nga si Pedro “Indo” Hautea kag municipal engineer Norman Lustria.
Ini may kaangtanan sa pagpameke sang mga dokumento para sa ginapahayag “mini market” nga wala na-materialize sang tuig 2000-2001.
Santo sa nangin desisyon sang Sandiganbayan 4th Division, magluwas sa pagka-preso, ginapamulta man ang duha sang tag-P15,00 kag indi na mahimo pa nga makapangalagad sa gobyerno.
Magluwas sa duha ka anay opisyal sang banwa, ginpamatbatan man sang Sandiganbayan si Punong Barangay Manuel Siaotong sang Brgy. Tinurian, Barotac, Nuevo Iloilo sang anom tubtob walo ka tuig nga pagkapreso kag ginapamulta sang P5,000 sa kaso nga one count of falsification.
Gindumilian naman ini nga makapangalagad pa sa gobyerno.