ILOILO CITY–Daku nga pagpanghangkat sa bag-o nga chairman ang pagpatigayon sang Miss Iloilo Dinagyang 2019.
Ang Ilonggo designer nga si PJ Arañador ang bag-o nga chairman sang nasambit nga pageant matapos nga nagtaliwan ang isa man ka Ilonggo designer nga si Alex Soncio.
Sa interview sang Bombo Radyo kay Arañador, iya ginpahayag nga pagpanghangkat sa iya nga buhaton nga mangin madinalag-on ang paghiwat sang Miss Iloilo Dinagyang 2019 nga may tema nga “Miss Iloilo Dinagyang 2019 Timeless Beauty, Exceptional Heart”.
Dugang pa ni Arañador, mangin bukas para sa tanan nga mga Ilongga ang nasambit nga pageant.
Magluwas diri, pahanugutan man nga magpakigbahin ang tanan nga Ilonggo designers.
Lakip sa mga qualification amo nga dapat may yara sang “exceptional beauty”, may maayo nga communication skills, maalam, may ikasangkol sa pagtib-ong sang kultura sang Iloilo, naga edad sang 16 anyos tubtub 26 anyos kag nagataas sang indi magnubo sa 5’5″.
Para sa mga aspiring beauty queen, mahimo nga magpasa sang application form tubtub sa November 3, 2018 samtang ang screening para sa Miss Iloilo Dinagyang 2019 ang patigayunon sa November 4 tubtub 5.