ILOILO CITY – Gin-athag ni Guimbal Mayor Oscar Garin nga wala sang may natabo nga one-on-one talk sa tunga nila ni Presidente Rodrigo Duterte kadungan sang ika-25 nga National Federation of Motorcycle Clubs in the Philippines nga ginhiwat sa Iloilo Convention Center (ICC).
Sa interview sang Bombo Radyo kay Garin, iya ginpahayag nga wala sang may natabo nga one-on-one talk kag kun may yara gid man, indi niya ini pag-ipahibalo sa publiko.
Sa baylo nga one-on-one talk, ginpahayag ni Garin nga ang natabo ang isa ka group meeting kaupod ang mga local candidate sa probinsya sang Iloilo sa diin mismo si anay Special Assistant to the President Christopher “Bong” Go ang nag-imbitar sa iya.
Ginpahayag man sang alkalde nga wala sang kamatuoran nga iya gin-istorya si Presidente Duterte agud lamang nga mapanas ang kun ano man nga kontrobersiya nga ginkaulamiran nila sang anak nga si 1st District Cong. Richard Garin.
Sa pagkamatuod suno sa alkalde, ginatugyan na lang nila sa korte ang pagdesisyon sa ila kaso.
