ILOILO CITY – May pahanumdum ang Iloilo City Disaster Risk Reduction Management Office (CDRRMO) may kaangtanan sa pagdumdum sang Semana Santa subong nga tag-ilinit.
Sa interview sang Bombo Radyo kay Darwin Papa, pinuno sang CDRRMO, iya ginpahayag nga may yara sang ‘basic’ nga pamaagi agud nga makalikaw sa heat stroke kag iban pa nga kalalat-an tuga sang tuman ka init nga klima ilabi na sa mga magabisita sa pilgrimage site.
Lakip sa mga ginapanugyan sang CDRRMO suno kay Papa amo ang mga masunod: dapat magsuksuk sang komportable nga bayo agud nga makagiho sang maayo, magbalon sang tubig sa baylo nga magsalig sa soft drinks kag juice kag dapat nga magdala sang kalo, payong, saron ukon ano man nga tabon bilang proteksyon sa tama ka singkal nga init sang adlaw.
Bangud nga ginalauman ang pagdagsa sang tawo, ginapanugyan sang CDRRMO nga likawan ang pagdala sang bata, lapsag kag mga senior citizen nga ginakabig ‘prone’ sa heat stroke.
Samtang, duha ka sahi sang common emergency ang masami nga ginarespondehan sang Iloilo City Responders (ICER) sa idalom sang Iloilo City Disaster Risk Reduction Management Office (CDRRMO).
Sa interview sang Bombo Radyo kay Joseph Procalla, pinuno sang Unit 1 sang ICER, iya ginpahayag nga madamu sang sahi sang common emergency ang ginarespondehan sang ila grupo apang ang trauma kag medical ang makabig nga ‘common’.
Ang halimbawa sang trauma emergency amo ang vehicular accident kag inaway samtang sa medical emergency naman nalakip ang mga nanari-sari nga balati-an.
Indi man malikawan suno kay Procalla nga may nagareklamo nga ulihi na lang mag-abot ang rescue team sang ICER.
Ini bangud nga suno kay Procalla, mahimo nga ulihi man ang paghatag sang impormasyon kag depende sa kalayuon sang lugar nga dapat nila kadtuan.
Sa pihak sang mga pagpanghangkat, ginpahayag sang natungdan nga may yara sang tatlo ka unit ang ICER nga 24/7 nga naka-stand by kag handa nga maghatag sang bulig sa tion sang emerhensya.
