Miagao Iloilo-– Ginpasakaan na sang kaso ang isa ka katapo sang New Peoples Army (NPA) nga nadakpan matapos ang nagluntad nga engkwentro sa Sitio Bumbong Barangay Masaroy Calinog Iloilo.
Ang nadakpan ang ginkilala nga si Alyas Fernan, legal ang edad kag residente sang nasambit nga lugar.
Sa exclusive interview sang Bombo Radyo kay Lt. Col Joel Benedict Batara, Commander sang 61st Infantry Batallion Philippine Army, iya ginpahayag nga nagluntad ang engkwentro sa tunga sang militar kag sang ginabanta 10 ka miyembro sang 3rd platoon central front Komiteng Rehiyon Panay bnga ginapamunuan ni Alyas Tonying.
Suno kay Batara si Alyas Fernan ang nagaserbe bilang finance and logistics officer sang mga rebelde.
Gin-ako man mismo ni Alyas Fernan sa mga otoridad nga miyembro siya sang rebelde nga grupo kag kumpirmado naman ini sa mga intelligence units sang militar.
Posible naman suno kay Batara nga may yara sang nagkalapilasan sa bahin sang mga rebelde samtang wala naman sang nasamaran sa tropa sang gobyerno.
Narekober naman sang mga militar suno sa natungdan ang mga nagkalain lain nga armas nga ginalakipan sang caliber 30 garand, m79 grenade launcher,12 gauge shot gun, caliber 38 revolver, apat ka rifle grenade, kag rounds sang 40mm nga para sa m203 grenade launcher.
Nagpalagyo naman suno kay Batara ang mga rebelde matapos sang nagluntad nga insidente.
