ILOILO CITY – Nagpaathag ang Chairman sang Committee on Social Services and Disaster Relief sa Iloilo City Council kun nga wala ini nagapabor sa pagdeklarar sang state of calamity sa Syudad sang Iloilo.
Sa exclusive interview sang Bombo Radyo kay Konsehal Love Baronda, iya ginpahayag nga may yara sila sang wala nakasugtan ni Iloilo City Administrator Atty. Hernando Galvez sa ginpatigayon nga emergency meeting sang Lunes, isa ka adlaw antes ang regular session sang Sangguniang Panlalawigan sa diin mayor nga agenda amo ang pagdeklarar sang state of calamity sa syudad.
Suno kay Baronda, luyag sini nga magdeklarar sang state of calamity apang nagakadapat nga ibutang sa title sang resolution nga bangud ini sa water crisis kag drought.
Katuyuan sini suno sa konsehal nga indi na matandog pa ang pondo nga wala sang kaangtanan sa kakulang sang tubig.
Ginpahayag ni Baronda nga may yara sang P2.7 million nga pondo ang syudad para sa 30 ka adlaw nga pag supply sang tubig sa diin kuhaon ini sa P67 million nga trust fund.
Ang P125 million nga pondo nga para kuntani sa calamity fund ang tuman kadako kag posible magamit sa kurapsyon ilabi na nga wala sang matabo nga bidding.
