Cong. Jerry Treñas
ILOILO CITY – Ginpaboran ni Iloilo City Lone District Cong. Jerry Treñas ang pahayag sang mga legal counsel sang mga kaalyado sini sa Sangguniang Panlunsod nga iligal ang pagdeklarar sang state of calamity sa Syudad sang lloilo.
Sa exclusive interview sang Bombo Radyo kay Treñas, iya ginpahayag nga wala sang quorum ang konsehal sang nagpatigayon sang special session kag wala man nakapasar sa mga requirement sa state of calamity.
Suno kay Treñas, indi bastante ang ginplastar nga rason sang mga konsehal sa pagdeklarar sang state of calamity.
Matandaan nga ginpahayag sang mga legal counsel nga ang deklarasyon sang state of calamity ang paglapas sa Republic Act No. 10121 sa diin nasaad nga nagamit sang sala nga data agud makakuha sang funding.
Magluwas sini, indi man mahimo nga makapagwa sang pondo sang gobyerno subong nga election period kun wala sang pahanugot sang Commission on Elections (Comelec).
Sa ulihi, ginpanawagan sang mga legal counsel sa Comelec Law Department, National Disaster Risk Reduction and Management Council kag sa Office of the Ombudsman nga imbestigaran ang nasambit nga butang kag pasakaan sang kaso ang alkalde, mga executive assistant sini kag sa mga konsehal nga amo ang sa likod sa pagpasar sang state of calamity sa Syudad sang Iloilo.
Una na nga ginpanindugan ni Iloilo City Mayor Jose Espinosa nga valid ang pagdeklarar sang state of calamity bangud may quorum ang Sangguniang Panlunsod.
Gintudlo man sini si Cong Treñas nga amo ang nagmando sa mga kaalyado sini sa Sangguniang Panlunsod nga indi magsuporta sa pagpasar sang state of calamity.
Sa subong, plano ni Espinosa nga magpadala sang sulat sa National Disaster Risk Reduction and Management Council (NDRRMC) agud pormal na nga madeklarar ang state of calamity sa Syudad sang Iloilo.
Suno kay Espinosa, wala pa sini napirmahan ang resolusyon bangud yara pa ang mga dokumento sa Sangguniang Panlalawigan.
Gintawag naman ni Espinosa nga wala naga angot ang utok sang mga konsehal nga naga kontra sa pagdeklarar sang state of calamity.
