DINGLE, ILOILO – Dakup ang punong barangay sang Brgy. Abangay, Dingle, Iloilo matapos ginserbehan sang search warrant may kaangtanan sa paghupot sang indi lisensyado nga mga armas.
Ang subject ang ginkilala kay punong barangay Carlito Jubelag, 52 anyos.
Sa interview sang Bombo Radyo kay Police Lt. Col. Anthony Gantang, pinuno sang Iloilo Criminal Investigation And Detection Group (CIDG), iya ginpahayag nga nakakuha sila sang impormasyon nga may mga armas si Jubelag kag ila ini nakumpirma pinaagi man sang monitoring.
Ang mga na rekober amo ang isa ka unit sang homemade 12 gauge shotgun; isa ka unit sang .38 caluber revolver; isa ka unit sang 12 gauge shotgun magazine; 10 ka bilog sang 12 gauge shotgun ammunition; tatlo ka .38 ammunition kag isa ka .38 holster.
Kaso nga paglapas sa Republic Act No.10591 ang ipasaka sang CIDG sa nasambit nga subject.
