Ginabanta masobra 700 ka mga katapo sang Philippine Army ang iga-deploy sa nagkalain-lain nga lugar sa Western Visayas partikular ang Antique, Capiz kag Iloilo agud nga magbulig sa Philippine National Police (PNP) sa pagsigurado nga matawhay kag malinong ang May 13 midterm elections.
Sa interview sang Bombo Radyo kay Lt. Col. Joel Benedict Batara, Commanding Officer sang 61st Infantry Batallion sang Philippine Army, iya ginpahayag nga ang prayoridad sang Philippine Army amo nga ma butangan sang mga militar ang mga lugar nga yara nalakip sa election hotspot areas.
Suno kay Batara, indi man nila mahimo nga mabantayan ang tanan nga lugar apang nagapangabay siya sa mga pumuluyo nga magbulig sa pagpabilin nga malinong ang election period.
Nagpanawagan man si Batara sa publiko nga mangin wais sa pagboto kag mangin responsable bilang manug boto.
Kun may yara sang presensya sang New People’s Army (NPA) kag Private Armed Groups, kinahanglan nga ipabalo ini gilayon sa Philippine Army ukon pulis.
