Indi interesado si Presidente Rodrigo Duterte sa pagpasaka sang kaso sa mga personalidad nga ginapahayag tuyo nga gub-on ang iya nga administrasyon.
Ini matapos nga ginpagwa ni Presidential Spokesperson Atty. Salvador Panelo ang diagram sang mga indibidwal nga nalakip sa destabilization plot kag mga nagapangampanya sa mga senatorial candidates sa oposisyon agud nga magdaog sa May 13 midterm elections.
Suno kay Panelo, nakadepende na sa Department of Justice (DOJ) kun pasakaan sang kaso ang mga nasambit nga personalidad lakip na ang mga Liberal Party, Magdalo party-list kag pila ka mga media outlets.
Apang suno kay DOJ secretary Meynardo Guevarra, tun-an niya anay kun bala bastante kag matuod ang basehan sang pagkilala sa mga tawo nga nalakip sa bag-o nga matrix pinaagi sa bulig sang National Bureau of Investigation.
Magluwas sini, ginbuyagyag man ni Duterte nga ang Magdalo group amo ang yara sa likod sang Ang Totoong Narcolist videos sa diin ang narrator ang nagpakilala nga si Bikoy nga amo ang nagpahayag nga nalakip sa illegal drug trade ang myembro sang pamilya kag abyan sang Presidente.
Nagapati si Duterte nga black propaganda lamang ang nasambit nga video kag nagalaum siya nga magguwa sa gihapon ang kamatuoran.
