City Councilor elect Rudolph “Roding” Ganzon, ginplastar ang mga plano sa syudad sang Iloilo

ILOILO CITY – Nagbunga ang resulta sang survey nga ginpatigayon sa syudad sang Iloilo antes pa man ang Mayo 13 nga eleksyon.

Ini ang nangin pahayag ni Iloilo City Councilor-elect Rudolph “Roding” Ganzon matapos nga nangin madinalag-on sa pagkakonsehal sa syudad.

Sa interview sang Bombo Radyo kay Ganzon, iya ginpahayag nga manami sa pamatyagan nga ang pulso sang syudad sang Iloilo ang nagasuporta sa iya.

Suno kay Ganzon, matuod gid ang survey sa diin mayorya sa ila grupo kaupod si Iloilo City Lone District Congressman kag Mayor elect Jerry Treñas ang nagdaog sa eleksyon.

Gin-ako man ni Ganzon nga indi mahapos ang iya nga pagpadalagan bilang konsehal bangud iya ginadala ang pangalan man sang iya nga lolo nga si anay Iloilo City Mayor Roding Ganzon.

Apang ginpasalig ni Councilor-elect Ganzon nga masarangan niya nga ipadayon ang naumpisahan sang iya nga lolo.

Ginapabugal man sang natungdan nga mabalik na sa pagserbisyo ang pangalan nga “Roding Ganzon” agud nga buligan ang mga pumuluyo.

Samtang ginplastar man ni Ganzon ang iya mga plano sa syudad bilang una niya nga termino sa konseho.

Luyag sang konsehal nga hatagan sang igtalupangod ang sports, edukasyon kag turismo sa syudad ilabi na ang paghatag sang giya sa mga pamatan-on.

Pasalamatan gid sang dako ni Ganzon kun siya ang makakuha sang Committee on Tourism, Sports, Trade and Commerce kag International relations sa Sangguniang Panlunsod.

Ini bangud nga kumpiyansa siya nga dako ang iya nga mabulig sa komitiba bangud bentaha ini sa iya.

Samtang, wala naman ginkalipatan sang newly elected official nga pasalamatan ang iya mga kaupdanan sa grupo ni Treñas, ilabi na ang Blue Angels nga nagasuporta sa ila nga grupo kag sa mga pumuluyo nga nagsalig, nagsuporta kag naghatag sa iya sang kahigayunan nga mangin isa sa magadumala sa syudad sang Iloilo.

Nagpasalig ang bag-o nga konsehal nga bayluhan niya sang maayo nga serbisyo ang pagpili sa iya sang mga pumuluyo sa diin iya na naumpisahan ang pagpangampanya sang positibo kag iya man ini nga padayunon pinaagi sa positibo man nga pagserbisyo.