Mayor-elect Jerry Treñas, pasakaan sang kaso ang mga dept. heads sang Iloilo City Hall nga nagkampanya para kay outgoing Mayor Espinosa sang midterm elections

Nagpamahog sang pagpasaka sang sampaw-sampaw nga kaso si Iloilo City Lone District Congressman kag subong Iloilo City Mayor-elect Jerry Treñas batok sa administrasyon ni outgoing Mayor Jose Espinosa III.

Ini sa tion nga may makit-an nga mga iligalidad sa mga transakyon sa idalom sang administrasyon ni Espinosa.

Sa interview sang Bombo Radyo Iloilo kay Cong. Treñas, iya ginpahayag nga pat-uron niya nga mabusisi kag maid-idan sang maayo sang Local Governance Transition Team sa patigayunon nga inventory sang mga propedad sang Local Government Unit; pagtipon kag pagpreserba sang tanan nga dokumento kag mga records;pag-audit sang mga personnel sang syudad kag madamo pa.

Suno sa kongresista, katuyuan sini nga maprotektahan ang interes sang pumuluyo sang syudad sang Iloilo.

Nahibaluan nga gintukod ang transition team bilang pamaagi sa pagpasiguro nga mangin matalunsay ang transisyon gikan sa daan nga administrasyon saylo sa bag-o nga administrasyon sa tion nga magpungko na ang mga bag-o na -elihir nga opisyales sang syudad sa Hulyo 1, 2019.

Samtang, nagpangabay naman si Espinosa kay Treñas nga kuntani indi na lang magpasaka sang kaso sa mga department heads nga ginapahayag nagkampanya para sa iya sang piniliay.

Suno kay Espinosa, wala ini nagapamilit sa bisan sin-o nga empleyado sang Iloilo City Hall nga magkampanya para sa iya.

Natural lang suno sa alkalde nga may banggi-anay kag may sakitanay sang buot sang eleksyon.

Apang subong nga natapos na ang eleksyon, kinahanglan nga mag move forward ukon magpinatawaray ang tanan.