ILOILO CITY – Ginapabalik sang Commission on Audit (COA) ang kapin sa P2 million nga ginpanagtag sang City Social Welfare and Development Office (CSWDO) para sa Social Pension Program sa mga Senior Citizen sa syudad sang Iloilo.
Sa sulat nga ginpadala ni Department of Social Welfare and Development (DSWD) Regional Director Ma. Evelyn Macapobre kay Iloilo City Mayor Jose Espinosa III, nakasaad nga kinahanglan nga ibalik sang CSWDO nga ginapamunu-an ni Ms. Gene Garingalao ang P1,830,000 nga pondo nga ginpanghatag sa 13,190 nga social pensioner.
Natukiban sang COA nga 420 sa mga social pensioner ang non-eligible beneficiary apang nakabaton sang P1,500 tubtub P4,500.
Bangud sini, ginapabalik sang COA ang P1,830,000 nga kantidad kalakip sang listahan sang 420 ka mga non-eligible beneficiary.
Sa patas nga pagwaragwag, ginpadulungan sang Bombo News Team ang CSWDO apang wala sa iya opisina si Garingalao.
Magluwas diri, indi man ma-contact ang numero ni Garingalao apang bukas man ang Bombo Radyo sa sabat sang CSWDO chief.
