ILOILO CITY – Nagdugang pa gid ang mga Barangay Official sa syudad sang Iloilo nga nagpahayag nga nakabaton sang social pension gikan sa City Social Welfare and Development Office (CSWDO).
Ini ang may kaangtanan sa mandu sang Department of Social Welfare and Development (DSWD) sa CSWDO nga ibalik ang kapin P2 million nga social pension nga ginpanghatag sa 420 ka mga non-eligible pensioners santo sa natukiban sang Commission on Audit (COA).
Sa interview sang Bombo Radyo kay Brgy. Kagawad Norma Robledo sang Guzman St., Mandurriao, Iloilo City, iya ginpahayag nga nakabaton siya sadto sang social pension apang ini ang nauntat sang nagdaug siya bilang barangay official.
Ginpahayag ni Robledo nga first term pa lang niya subong bilang barangay kagawad rason nga siya na lang ang nagmato-mato nga ipakakas ang iya pangalan sa listahan sang mga ‘beneficiary’ agud nga indi mahulog sa ‘double compensation’.
Samtang, kasubong man ang gindangatan ni Barangay Kagawad Ninfa Agustin sang Sta. Felomina, Arevalo, Iloilo City.
Nagpaiway nga maghatag sang recorded interview si Agustin apang suno sa iya, nauntat lamang ang iya ginabaton nga social pension sang nagdaug siya bilang barangay official sa ila lugar.
Agud nga makalikaw sa gamo, handa man siya nga ibalik ang kwarta nga iya nabaton.
May kaangtanan diri, wala pa nakahatag sang sabat ni CSWDO head Gene Garingalao.
Makapila ka beses nga gintinguhaan sang Bombo News Team nga makuhaan sang pahayag ni Garingalao paagi sa tawag apang wala nagasabat sang CSWDO head.
